سر الفلافل المحشيه بالصور + هديه

سر الفلافل المحشيه بالصور + هديه

السلام عليكم ورحمة الله وبركاته

كل سنه وانتوا بخير وسعاده وكل واحده محققه ما تتمنى يارب

كلنا خارجين من رمضان زهقانين من الخضار والاكل المطبوخ
فحبيت انزل طريقة الفلافل او الطعميه البيتي .. زي ما بنعملها
وان شاء الله هتعجبكم جدا
ريحه ولون وطعم جنااان والهديه في اخر الموضوع

بسم الله نبدأ

مقادير العجينه

نص كيلو فول مدشوش(مقشر) منقوع قبلها بيوم في ميه

كوبين ونصف - 3 أكواب كرات مقطعه(حزمتين ثلاثه كبار)
هو اللي بيدي اللون الأخضر الجميل للفلافل

حزمه صغيره خالص او كام عود كسبره خضراء مقطعه للطعم فقط
بلاش تكتروا من الكسبره الخضرا علشان هي اللي بتسود الطعميه بعد القلي

2 بصله خضراء صغيره مقطعه بالورق الاخضر بتاعها
راس ثوم مقشره
بصله متوسطه مقطعه

الطريقه

صفي الفول من الميه بتاعته كويس جدا واضغطي عليه
قطعي الخضار واخلطيهم مع الفول



افرميهم في مفرمة اللحمه مع بعض وكرري عملية الفرم حوالي 5-6 مرات(حسب قوة الماكينه عندك) حتى تنعم خالص



وهتحسي انها اصبحت هشه وهوائيه


ثم لو حبيتي تزودي في ضربها اضربيها مره ثانيه في كبة الخلاط (اللي بنفرم فيها البصل) حتى تصبح هشه وناعمه زياده

اللي ماعندهاش مفرمة اللحمه ممكن تستخدمي كبة الخلاط في طحنها وتنعميها كويس جدا ..
او بطريقه تانيه أسهل هاقولها في اخر الموضوع

قسميها في أكياس واحفظيها في الفريزر


ملاحظات:
لا تضيفي الملح و الكسبره الناشفه والبكنج صودا أو البكنج بودر الا قبل القلي مباشرة لان الملح بيخليها تنزل ميه والكسبره بتغمقها
وما تزوديش الكسبره الناشفه او الكسبره الخضرا علشان ما تغمقش في القلي
الافضل انك تعملى كميه بسيطه اول باول علشان تقليها وهي لسه مطحونه ..علشان تصبح هشه ومنتفخه
لو هتطحنيها في كبة الخلاط ممكن تضيفي شوية ميه صغيرين خااالص علشان يساعد على الفرم
ولما تطحن حطيها في مصفاه او شاشه تنزل ميتها ودخليها الثلاجه علشان لو فيها ميه هتفك في الزيت

كده احنا جهزنا العجينه ... نيجي بقى للحشو

حشو الفلافل

بصله كبيره مبشوره
معلقتين كبار بابريكا (فلفل ارناؤطي = فلفل احمر حلو مطحون)
وهو ده اللي بيديها اللون الغامق والطعم زي بتاع المطاعم
معلقة صغيره شطه او حسب الرغبه
رشة ملح

في معلقتين زيت على النار هنحمر البصله لحد لما يبقى لونها دهبي ..
وبعدين نضيف لها معلقتين ميه (شوية صغيرين خاالص) علشان تطرى وتستوي
ونسيبها على النار لحد لما تشرب الميه وتنشف
نسيبها تبرد على جنب



ونضيف لها البابريكا والشطه ورشة الملح ونقلبهم هتبقى بالشكل ده



نحشي الفلافل زي في الصور ونغطيها بالسمسم




ونقليها في زيت غزير متوسط الحراره علشان مش تتحرق ..
وتتقدم بالهنا والشفا



هنا الحشو داخل الفلافل بعد ما اتقلت ولونها اخضر جميل ازاي



===================
نيجي بقى للهديه وهي اسهل طريقه للطعميه

جربناها قريب .. وعجبتنا ومناسبه للي مش عندهم مفرمه ولا كبة في الخلاط

هتجيبي من عند العطار نص كيلو فول مدشوش مطحووون .. بيبقى بودره خشنه شويه
وبنفس المقادير
الكرات والكسبره والبصل الاخضر والبصل العادي والثوم وكل الخضره اضربيهم في كوباية الخلاط مع كوباية ميه صغيره
لحد لما ينعموا خالص ويبقوا زي العصير التقيل
حطيهم في طبق او في الكبه وضيفي لهم الفول المطحوون وقلبي لحد لما تتكون عندك العجينه
سيبيها شويه في الثلاجه

واقليها بعد ما تظبطي الملح والكسبره الناشفه ورشة كربونات صودا

يارب تجربوها وتعجبكم
منقول