قصيده جميله للشاعر الساخر احمد فؤاد نجم

موال الفول واللحمة

عن موضوع الفول واللحمة صرح مصدر قال مسئول

ان الطب اتقدم جدا والدكتور محسن بيقول

ان الشعب المصري خصوصا من مصلحته يقرش فول

حيث الفول المصري عموما يجعل من بني ادم غول

تأكل فخده في ربع زكيبه والدكتور محسن مسئول

يديك طاقة وقوة عجيبة تسمن جدا تبقى مهول

ثم اضاف الدكتور محسن ان اللحمه دي سم أكيد

بتزود أوجاع المعدة وتعود على طولة الايد

وتنيم بني ادم وتفرقع منه المواعيد

واللي بياكلوا اللحمة عموما حيخشوا جهنم تأبيد

يادكتور محسن يامزقلط يامصدر ياغير مسئول

حيث ان انتو عقول العالم والعالم محتاج لعقول

مارأى جنابك وجنابهم فيه واحد مجنون بيقول

احنا سيبونا نموت باللحمة وانتو تعيشوا وتاكلوا الفول

مارأيك ياكابتن محسن مش بالذمة كلام معقول

والله كلام جدا معقول
اللى بياكل لحمة ياأبنى
مش زى اللى بياكل فول
اللى بياكل لحمة ياأبنى
ده دايما راجل مسئول
وبيحتاج الساءل دايما
يبقى مخه مخ عجول
تيجوا نغيظه تيجو نقول
أبدا تانى ماناكل فول مش منظرة ولا برجوازية
احنا تعبنا من الطعمية
أصل السوس نخور ابدانا
والمسئول ضيع احلامنا
حتى ابويا فى يوم علمنا
أن الفول هايكون صديقنا
وان سالت فى يوم عن غيره
يبقى قفانا مكان وشوشنا
نفضل ناكل وبنتالم
ولا حرية ولا نتكلم
بس الصبر ياناس له حدود
واحنا بنعلن لكل الوجود
مش منظرة ولا برجوازية
احنا تعبنا من الطعمية